فازت الشاعرة عبير عصام، بالمركز الثاني في مسابقة حفل الشعر والموسيقى والذي أقيم بقصر محمد محمود.
وقدمت عصام، قصيدة عامية بعنوان "غربة روح" ، تقول في مطلعها:
الغربة مش مسافات.. ساعات حاجات جوانا
تكون ملازمانا.. لكنها بعيدة
الغربة غربة روح.. فإزاي نروح ليها
وإزاي تروح لينا.. مع إنها فينا
وازاي نعيد تفكير.. مع إننا نسينا
في ضحك كتير متحوش.. لكنه حالف مايشوف النور
عشان مجبور يعيش.. جوا سجن ضلوعك
عشان مكسور ومفيش.. طوق نجاة في بحر دموعك
سما روحك مليانة ضباب.. في الجرح صاب صميم القلب
أمتى المطر ينزل.. ويغسلك من الهموم
ويرجع عمرك اللي اتسرق.. ويطفي صفحات ماضيك اللي اتحرق
ويبدل اللي كان يوجع.. يرميه في خانة ذكريات
عشان ترجع كما كنت.. يجوز في أثر للجرح
يجوز تبهت الملامح.. يجوز تكون مش مسامح
كل اللي داسوا عليك.. كل اللي قالوا نسيب
كل اللي قالوا نصيب.. كل اللي قالوا تغيب
م انته كما الطيف ملكش وجود.. أصبحت كما الطوفان
بتجرف كل شئ هنا وهناك.. بتمحي حي من حينا وشباك
شاهد على كل دمعة اخدت منك عمر.. اخدت نصيبي من الوجع فترات
إزاي وجع بيقتل فينا.. وإزاي جريمه بدون بصمات
الغربه غربة روح.. ف إزاي نروح ليها
وإزاي تروح لينا
Enregistrer un commentaire